ಪುಟಗಳು

21.5.13



ಆಂಟಿ ವೈರಸ್

ಬೇಕು ಅನ್ನುವರುಂಟೆ ನಿನ್ನ...
'ಆಂಟೀ..'ಸುತ್ತಲೂ ನೋಡಿದೆ. ಯಾವ ಆಂಟಿಯೂ ಉತ್ತರಿಸಲಿಲ್ಲ. ನಿಮಿಷವೂ ಆಗಿರಲಿಲ್ಲ. ಆ 11ರ ಹುಡುಗಿ ಮತ್ತೆ ಆಂಟೀ ಅಂದಿತು. ಯಾಕೋ ಬಸ್‌ನಲ್ಲಿರುವ ಹುಡುಗರೆಲ್ಲ ನನ್ನನ್ನೇ ನೋಡುತ್ತಿದ್ದಾರೆನಿಸಿತು. ನಿಧಾನವಾಗಿ ಹುಡುಗಿಯೆಡೆ ತಿರುಗಿದೆ. ಅರೆ! ನನ್ನೇ ನೋಡುತ್ತಿದ್ದಾಳೆ. 'ಆಂಟೀ ನಂಗೆ ವಿಂಡೋ ಸೀಟ್ ಕೊಡ್ತೀರಾ?' ಎವೆ ಇಕ್ಕದೆ ನೋಡುತ್ತಾ ಕೇಳಿದಳು. 
ಅಯ್ಯೋ ನಾನಾ ಆಂಟೀ?! ಕೊಡುತ್ತಿದ್ದೆನೇನೋ ಅಕ್ಕ ಅಂದಿದ್ದರೆ. ಹಿಂದಿದ್ದ ಆ ಚೆಂದದ ಹುಡುಗ ಬೇರೆ ಕಿಸಕ್ ಅಂದ. 'ನನ್ಗೆ ವಾಮಿಟಿಂಗ್ ಸೆನ್ಸೇಷನ್. ಸೋ ಹಿಂದೆ ಕುಳಿತಿರೋ ಅಂಕಲ್‌ಗೆ ಕೇಳು, ಬಿಟ್‌ಕೊಡ್ತಾರೆ' ಅಂದೆ ಮುಯ್ಯಿ ತೀರಿಸುವಂತೆ. ಅವಳು ಹೋಗಿ ಕೇಳಿದಳು. 'ಆಂಟಿ ಬರ್ತಾರಂದ್ರೆ ಬಿಟ್ ಕೊಡ್ತೀನಿ. ನೀ ಅಲ್ಲಿ ಕೂತ್ಕೋ ಪುಟ್ಟಿ' ಅಂದ!
ಈಗಿನ ಕತೆ ಹಾಳಾಗಿ ಹೋಗ್ಲಿ, ಆರನೇ ತರಗತಿಯಲ್ಲಿದ್ದಾಗ ಎದುರು ಮನೆಯ ಆಗ ತಾನೇ ಮಾತು ಕಲಿತ ಹುಡುಗನನ್ನು ಪ್ರಿ ಕೆಜಿಗೆ ನಮ್ಮ ಶಾಲೆಗೇ ಸೇರಿಸಿದರು. ಬಸ್ಸಿನಲ್ಲಿ ಶಾಲೆಗೆ ಅರ್ಧ ಗಂಟೆಯ ಪ್ರಯಾಣ. ಹೀಗಾಗಿ ಆತನನ್ನು ನನ್ನ ಸುಪರ್ದಿಯಲ್ಲಿ ಬಿಟ್ಟು, 'ಆಂಟಿ ಕೈ ಹಿಡ್ಕೊಂಡೇ ರೋಡ್ ದಾಟ್ಬೇಕು ಆಯ್ತಾ?' ಎಂದು ಗಿಣಿಗೆ ಹೇಳಿದಂಗೆ ಹೇಳಿಕೊಟ್ಟರು. ಆ ಹುಡುಗನೂ ಅದನ್ನು ಗಿಣಿಯಂತೇ ಕಲಿತೂ ಬಾಯಿ ಬಿಟ್ಟರೆ ಆಂಟಿ ಎನ್ನತೊಡಗಿದ. ಅದೆಂಥ ಅವಮಾನವೆನಿಸುತ್ತಿತ್ತೆಂದರೆ ಒಬ್ಬಳೇ ಸಿಕ್ಕಾಗೆಲ್ಲ 'ಅಕ್ಕಾ' ಎನ್ನಬೇಕೆಂದು ಮುದ್ದಿನಿಂದ, ಗುದ್ದಿನಿಂದ ಸಾವಿರ ಬಾರಿ ಹೇಳಿಯಾಯಿತು. ಊಹ್ಞೂಂ, ಹುಡುಗ ಮಾತೃವಾಕ್ಯ ಪರಿಪಾಲಕನ ರೀತಿ ಆಂಟಿ ಎನ್ನುವುದನ್ನು ಬಿಡಲಿಲ್ಲ. ಹುಡುಗನ ದೂರಾಲೋಚನೆ ಗಮನಿಸಿದಿರಾ? ದೊಡ್ಡ ಆದ ಮೇಲೆ 'ಆಂಟಿ ಪ್ರೀತ್ಸೆ' ಎನ್ನಬಹುದು. 'ಅಕ್ಕಾ ಪ್ರೀತ್ಸೆ' ಎನ್ನಲಾದೀತೇ? ಈ ಹುಡುಗರ ಬುದ್ಧಿಯೇ ಹೀಗೆ!
ವರ್ಷದ ಹಿಂದೆ ಓದು ಮುಗಿದು ಕಾಲೇಜೊಂದರಲ್ಲಿ ಲೆಕ್ಚರರ್ ಆಗಿ ಸೇರಿಕೊಂಡೆ. ಸೀರೆ ಉಡುವುದು ಕಡ್ಡಾಯವಾಗಿತ್ತು. ಆಗ ತಾನೇ ಸೀರೆ ಉಟ್ಟು ನಡೆಯಲು ಕಲಿಯುತ್ತಿದ್ದ ನನ್ನದೇ ವಯಸ್ಸಿನ ನಾಲ್ವರು ಹೆಣ್ಣುಮಕ್ಕಳು (?) ಜ್ಯೂಸ್ ಕುಡಿಯಲೆಂದು ಹೋಟೆಲ್‌ಗೆ ಹೋದೆವು. 20ರ ಹರೆಯದ ಸರ್ವರ್ ಬಂದು 'ಏನ್ ಬೇಕು ಆಂಟಿ?' ಎಂದು ಗೆಳತಿಯ ಮುಖ ನೋಡುತ್ತಾ ಕೇಳಿದ. ಎಲ್ಲರಿಗೂ ಇರಿಸುಮುರಿಸು. 'ನಾಲ್ಕು ಮೂಸಂಬಿ ಜ್ಯೂಸ್ ತಗೊಂಬಾ ಮರೀ' ಎಂದಳು. ಅವನು ತಿರುಗಿ ಬಂದ ಬಾಣಕ್ಕೆ ಹೆದರಿ ಒಳಹೋದ ನಂತರ ಮತ್ತೆ ನಾಲ್ಕು ಬಾರಿ 'ಮರೀ ಜ್ಯೂಸ್ ಇನ್ನೂ ಆಗಿಲ್ವಾ?' ಎಂದು ಬೇಕೆಂದೇ ಕೇಳಿದೆವು. ಮತ್ತಾತ ಎದುರಿಗೆ ಬರಲೇ ಇಲ್ಲ. ಬೇರೊಬ್ಬ ಸರ್ವರ್ ಜ್ಯೂಸ್ ತಂದಿಟ್ಟ. ತಕ್ಕ ಶಾಸ್ತಿ ಮಾಡಿದ ಸಂಭ್ರಮದೊಂದಿಗೆ ಹೊರ ಬಂದೆವು. ಅಲ್ಲಾ, ಈ ಹುಡುಗ್ರು ನಾಟೀ ಅನ್ನಲಿ, ತುಂಟಿ, ಪಂಟಿ, ಬಂಟಿ ಅನ್ನಲಿ, ಹೋಗ್ಲಿ ಘಾಟಿ ಅಂತನೇ ಅನ್ಲಿ- ಒಳಗೊಳಗೇ ಬೀಗಿಬಿಡುತ್ತೇವೆ. ಆದರೆ ಈ ಆಂಟಿ ಅಂತಾರಲ್ಲಾ ಮೈ ಎಲ್ಲ ಪರಚಿಕೊಳ್ಳುವ ಹಾಗಾಗುತ್ತೆ. ಹೀಗಾಗಿ ಈ ಹುಡುಗರೆಂಬ ಅಂಕಲ್‌ಗಳು ನಮ್ಮ ಕಷ್ಟವನ್ನು ಅರ್ಥಮಾಡಿಕೊಳ್ಳಬೇಕಾಗಿ ಈ ಮೂಲಕ ವಿನಂತಿ.ನಮ್ಮಮ್ಮನೇ ಇನ್ನೂ ಆಂಟೀ ಪಟ್ಟದಿಂದ ಪ್ರಮೋಶನ್ ಪಡೆದಿಲ್ಲ. ಅಂಥದ್ದರಲ್ಲಿ ಪ್ರತಿ ವರ್ಷವೂ ಸ್ವೀಟ್ ಸಿಕ್ಸ್‌ಟೀನ್‌ನ ಬರ್ತ್‌ಡೇ ಆಚರಿಸಿಕೊಳ್ಳುವ ನಮಗೆ ಆಂಟೀ ಅಂದ್ರೆ ಹೇಗೆ ಸಹಿಸೋಣ ಹೇಳಿ?!
- ರೇಶ್ಮಾ ರಾವ್ ಸೊನ್ಲೆ (ಕನ್ನಡಪ್ರಭದಲ್ಲಿ ಮೇ 21, 2013 ರಂದು ಪ್ರಕಟ )

5 ಕಾಮೆಂಟ್‌ಗಳು:

Badarinath Palavalli ಹೇಳಿದರು...

ಹೌದು ಮೇಡಂ, ಎದುರು ಮನೆಯ ಮುದುಕಿ ಸಹ ನನ್ನ ಮನೆಯಾಕೆಯನ್ನು ಆಂಟಿ ಅಂತಲೇ ಸಂಭೋಧಿಸಿದಾಗ, ಅವಳಿಗಿರಲಿ ನನಗೇ ನಖ ಶಿಖಾಂತ ಕೋಪ ನೆತ್ತಿಗೇರುತ್ತದೆ.

http://badari-poems.blogspot.in/

ಅನಾಮಧೇಯ ಹೇಳಿದರು...

article thumba chennagide aunty :P

Reshma Rao ಹೇಳಿದರು...

@badarinath palavalli ; haha...ella sambandakkoo paryaya pada aaagi hogide aunty, uncle annodu ...

Reshma Rao ಹೇಳಿದರು...

thanq :) but yaru ee uncle anta gottagilla ;)

ಅನಾಮಧೇಯ ಹೇಳಿದರು...

thamma abhimani :) :)