ಮಿಲ್ಲಿಯ ಗಂಡ ಯಾರು??

ಮಿಲ್ಲಿ ನಮ್ಮ ಹಾಸ್ಟೆಲ್ ಬೆಕ್ಕು.ವಯಸ್ಸಿನ್ನಲ್ಲಿ ನಮಗಿಂತಾ ಎಷ್ಟೋ ಚಿಕ್ಕದಾದರೂ ಈಗಾಗಲೇ ಹಲವು ಮರಿಗಳನ್ನು ಹೆತ್ತು ತಾನು ತುಂಬಾ ದೊಡ್ದವಳೆಂದು ಬೀಗಿದೆ.. ನಾಲ್ಕು ತಿಂಗಳ ಹಿಂದಷ್ಟೇ ಒಂದೊಂದೇ ಮರಿಗಳನ್ನು ಕಚ್ಚಿಕೊಂಡು ಬಂದು ನಮ್ಮ ಹಾಸ್ಟೆಲ್ ಒಳಗಿಟ್ಟು ನಮಗೆಲ್ಲಾ ತನ್ನ ಮರಿಗಳನ್ನು ನೋಡಿಕೊಳ್ಳುವ ಜವಾಬ್ದಾರಿಯನ್ನು ನೀಡಿತ್ತು. ಬಿಳಿಯ,ಚಿಕಣಿ ,ಕೆಂಪಿ,ಹುಲಿಯ ಎಂದು ಮರಿಗಳ ಬಣ್ಣ,ಆಕಾರದ ಮೇಲೆ ಹೆಸರಿತ್ತು ಆಟ ಆಡಿಕೊಂಡಿದ್ದ ನಮಗೆ ದಿನಗಳೆದಂತೆಲ್ಲಾ 5ಕಾಲಡಿ ಕೈಯ್ಯಡಿ ಸಿಕ್ಕುವಾಗ,ಅಷ್ಟನ್ನೂ ಇಟ್ಟುಕ್ಕೊಳ್ಳಲು ಸಾಧ್ಯವಾಗದೆ ಎರಡೆರಡು ಮರಿಗಳನ್ನು ಒಬ್ಬೊಬ್ಬರ ಮನೆಗೆ ಸಾಗಿಸಿದೆವು..ಅಷ್ಟಾಗಿ ಇನ್ನೂ ೩ ತಿಂಗಳಾಗಿಲ್ಲ,ಮತ್ತೆ ಮಿಲ್ಲಿ ಬಸುರಿ!ಮಿಲ್ಲಿಯ ರಸಿಕತೆಗೆ ಬೆರಗಾದೆವು..ಇದೀಗ ಇಂದು ಬೆಳಿಗ್ಗೆ ಎದ್ದಾಗಿನಿಂದ ವಿಚಿತ್ರವಾಗಿ ಕೂಗುತ್ತಿದ್ದ ಮಿಲ್ಲಿ ಸೈಲೆಂಟ್ ಆಗಿ ಮಲಗಿದ್ದನ್ನು ನೋಡಿ ಏನಾಯ್ತು ನೋಡುವಾಗ ಎದುರಿನಲ್ಲಿ ಕರಿ ಕಾಲು ಬಾಲದ ಪುಟ್ಟ ಮರಿ!ಅದು ಇಲಿಮರಿಯೋ ಬೆಕ್ಕಿನದೇ ಮರಿಯೋ endu ನೋಡುತ್ತಿರುವಾಗ ಕಣ್ಣೆದುರಿಗೇ ಮಿಲ್ಲಿ ಎದ್ದು 'ಪುಳಕ್ 'ಎಂದು ಮತ್ತೊಂದು ಕಪ್ಪು ಮರಿಯನ್ನು ಭೂಮಿಗಿಳಿಸಿ ನಮ್ಮನ್ನೆಲ್ಲಾ ಪುಳಕಗೊಲಿಸಿದಳು!! ಮತ್ತರ್ಧ ಗಂಟೆಯಲ್ಲಿ ಇನ್ನೆರಡು ಮರಿಗಳು ಹೊರಜಗತ್ತಿಗೆ ತಮ್ಮ ಪುಟ್ಟ ಪಾದಗಳನ್ನಿಳಿಸಿದವು.. ಕಳೆದ ಬಾರಿ ಎರಡು ಹುಲಿ ಬಣ್ಣದ ಎರಡು ಬಿಳಿ ಬಣ್ಣದ ಮರಿ ಹಾಕಿದ್ದ ಮಿಲ್ಲಿ ಈ ಬಾರಿ ಎರಡು ಕಪ್ಪು ಎರಡು ಬಿಳಿ ಮರಿಗಳನ್ನು ಹಾಕಿದ್ದಾಳೆ.ಯಾವಾಗಲೂ ಹಾಸ್ಟೆಲ್ ಹೊರಗೆ ಒಂದು ಬಿಳಿ ಹಾಗೂ ಒಂದು ಬೆಕ್ಕಿನ ಬಣ್ಣದ ಗಡವ ಬೆಕ್ಕುಗಳು ಓಡಾಡುತ್ತಿರುತ್ತವೆ.. ಇದರಲ್ಲಿ ಹೀಗೆ ಬಣ್ಣಬಣ್ಣದ ಮರಿಗಳನ್ನು ಹೆರುವ ಮಿಲ್ಲಿಯ ಗಂಡ ಯಾರೆಂಬುದೇ ಸಧ್ಯಕ್ಕೆ ನಮ್ಮನ್ನೆಲ್ಲಾ ಕಾಡುತ್ತಿರುವ ಪ್ರಶ್ನೆ!!

(ಉದಯವಾಣಿಯಲ್ಲಿ ಪ್ರಕಟ)

ನಾವಿಸ್ಟು ಬೇಗ ದೊಡ್ಡವರಾಗಬಾರದಿತ್ತು!!

ಭಾನುವಾರದ ಈ ಸಂಜೆ ನಾನು ಮತ್ತು ಮೇ (ಮೇದಿನಿ)ನಮ್ಮ ನಮ್ಮ ಹಳೆಯ ಡೈರಿಗಳನ್ನು ಹರವಿಕೊಂಡು ಒಂದೊಂದೇ ಎನ್ನುತ್ತಾ ಹೆಕ್ಕಿ ತೆಗೆಯುವಾಗ ನೂರಾರು ಹಳೆಯ ನೆನಪುಗಳು ಸುತ್ತಲೂ ಹರಡಿ ಬಿದ್ದವು..ಮರೆತ ಮುಖಗಳೆಲ್ಲಾ ಎದುರಿನಲ್ಲೇ fashion show ನಡೆಸಿದವು..
ತುಂಬಿಹೋದ ಡೈರಿಯ ತುಂಬಾ ತುಂಬಿಕೊಂಡ ಬದುಕು..ನೆನಪುಗಳ ರಫ್ತು,ಆಮದು ಕಾರ್ಯಗಳು ಮುಗಿಯುವಷ್ಟರಲ್ಲಿ ಏನನ್ನೋ ಕಳೆದುಕೊಂಡ ಭಾವ ಇಬ್ಬರಲೂ ಮೂಡಿತ್ತು..ಕಾಡಿತ್ತು..ನಾವಿಷ್ಟು ಬೇಗ ದೊಡ್ಡವರಾಗಬಾರದಿತ್ತು!!!

ಒಂದು ಸಂಜೆ..

ಮುಗಿಲಿಗೆ ದಿಗಿಲು!
ಕರಗಿ ಧರೆಗಿಳಿವುದೋ..
ಹೆಪ್ಪುಗಟ್ಟಿ ಮರೆಯಾಗುವುದೋ..??

ಒಡಲಾಳದಿ ಬೆರೆತಿದೆ ಬೆಳಕು ಹಾಗೂ ಕಟ್ಟಲು
ಆಕಾಶದವಕಾಶವೆಲ್ಲಾ ಗೋಜಲು ಗೋಜಲು.

ನೇಸರನ ಮುಚ್ಚಿಟ್ಟು ಬಣ್ಣ ಕಳೆದುಕೊಂಡ ಬದುಕು
ಮುಗಿದುಹೋದಂತೆ ಆಗಸದ ರಸಸ್ಪರ್ಶಿ ಸರಕು..

ಅಂಬರದ ಅಂಗಳದಿ ಸ್ಮಶಾನಮೌನ
ಮೋಡಗಳ ತೊಟ್ಟಿಲಿಗೆ ಕವಿದಿರುವ ಗ್ರಹಣ..

ಸದ್ದು ಮಾಡದೆ ಗಾಳಿ ಸಣ್ಣಗೆ ಗುನುಗುತ್ತಿದೆ ಚರಮಗೀತೆ
ನಿಂತುಹೋದಂತೆ ಸಮಯ,ಹುಟ್ಟಲಾರದ ಕವಿತೆ.

ಮೇದಿನಿಯಲ್ಲಿ ನನ್ನ ಮಾರ್ದನಿ

ಬೆಳಿಗ್ಗೆ ತಾನೇ ಕಾಳಜಿಯಾಗಿ ಕಣ್ಣಂಚು ತುಂಬಿಕೊಂಡು ಮಿಂಚುವಂತೆ ಮಾಡಿದ ಆಕೆಯ ಮೃದು ಧ್ವನಿ ಈಗ ಕೋಪದಲ್ಲಿ ತರಗುಟ್ಟುತ್ತಾ ಬಾಣದಂತೆ ಮೈಗೆರಗುತ್ತಿವೆ..ಮೊನ್ನೆ ಮಾತು ಬಿಟ್ಟು ಮುಖ ಉಬ್ಬಿಸಿ ಕುಳಿತ ಹುಡುಗಿ ನಿನ್ನೆ ಅಳುವಾಗಿ ಬಂದು ಅಪ್ಪಿ ನನ್ನನ್ನೂ ಕರಗಿಸಿದಳು.,ಮಾತು ಬಿಟ್ಟ ಕ್ಷಣದ ಮಾತುಗಳೆಲ್ಲಾ ಬಟ್ಟೆ ಒದ್ದೆ ಮಾಡಿದ್ದ ಆಕೆಯ ಕಣ್ಣೀರಿನಲ್ಲಿ ಅಡಗಿ ಕುಳಿತಿದ್ದವು!
ಆಕೆ ಚಂಚಲೆ..ನನ್ನಾಳವನ್ನು ಆಕ್ರಮಿಸಿಕೊಂಡ ಆಪ್ತಗೆಳತಿ.ಹೆಚ್ಚಿನ ಬಾರಿ ನಮ್ಮಿಬ್ಬರ ಕಣ್ಣುಗಳೇ ಮಾತನಾಡಿಕೊಳ್ಳುತ್ತವೆ.
ಬೇರೆ ಗೆಳತಿಯರೊಂದಿಗೆ ಮಾತನಾಡುವಾಗ ,ನಗುವಾಗ ಅದೇನೋ ಭಯಮಿಶ್ರಿತ ಮತ್ಸರವನ್ನು ಕಂಡಿದ್ದೇನೆ ಆಕೆಯ ಕಂಗಳಲ್ಲಿ..
ಜಗಳವಾಡುವಾಗ ಅಕ್ಕನೊಂದಿಗಿರುವ ಸಲುಗೆ,ಆಕೆಯ ತೊಡೆಯ ಮೇಲೆ ಮಲಗಿದಾಗ ಅಮ್ಮನ ವಾತ್ಸಲ್ಯವನ್ನು ಜೋತೆಗಿಡುವ ತಟ್ಟುವ ಕೈಗಳು,ಪ್ರೀತಿ..ಹುಡುಗ ಎಂದೆಲ್ಲ ಹರಟುವಾಗ ಗೆಳತಿಯೊಂದಿಗಿನ ಮುಜುಗರರಹಿತ ವಾತಾವರಣ-ಎಲ್ಲವೂ ನನ್ನದಾಗಿರುತ್ತದೆ,ಆಕೆಯ ಸಾನಿಧ್ಯದಲ್ಲಿ..ಕನಸು ಹಾಗು ನನಸು-ಎರಡಕ್ಕೂ ಸಾಥ್ ನೀಡುವಾಕೆ.
ಒಮ್ಮೊಮ್ಮೆ ಮಗುವಿನಂತೆ ಮುಗ್ಧತೆಯ ಗೂಡಾಗಿ ಕಂಡರೆ ಮತ್ತೊಮ್ಮೆ ಅಡಗೂಲಜ್ಜಿಯಂತೆ ಅನುಭವದ ಹಾಡುಗಳನ್ನು ಹೊತ್ತು ಹತ್ತಿರ ಬರುವ ಚವತಿ..ಆಕೆ ನನ್ನ ಜೀವದ ಗೆಳತಿ.ಅವಳ ಕೋಪ,ಅಹಂಕಾರ,ಮದ,ಕಾಳಜಿ,ಮತ್ಸರ,ಹಠಮಾರಿತನ,ವಾತ್ಸಲ್ಯ,ನಗು,ಅಳು,ಭಯ-ಎಲ್ಲದರ ಹಿಂದಿರುವುದೂ ಪ್ರೀತಿ ಹಾಗೂ ಪ್ರೀತಿಯೊಂದೇ..
ಗಂಡುಭೀರಿಯಂತೆ ನಿರ್ಭಿಡೆಯಿಂದ ವರ್ತಿಸುವ ಆಕೆಯ ವರ್ತನೆಯ ಆಳದಲ್ಲಿ ಇಣುಕುವುದೂ ಪ್ರೀತಿ..ಹೆಣ್ತನ..

ಎಲ್ಲಾ ಹೆಣ್ಣುಗಳಂತೆ ಆಕೆಯೂ ಕರಗುತ್ತಾಳೆ ,ಕರಗಿಸುತ್ತಾಳೆ ,ನಗುತ್ತಾಳೆ,ಅಳುತ್ತಾಳೆ,,ಭಯಗೊಳ್ಳುತ್ತಾಳೆ,ಸಿಟ್ಟಾಗುತ್ತಾಳೆ..ಆದರೂ
ಉಳಿದವರಿಗಿಂತ ಭಿನ್ನತೆಯ ಅಂಶವೊಂದನ್ನು ಕಂಡೂ ಕಾಣದಂತೆ ಪ್ರಚುರಪಡಿಸುತ್ತಾಳೆ.ನನ್ನ ಎಲ್ಲಾ ಭಾವನೆಗಳಲ್ಲೂ ನಿರ್ಧಾರಗಳಲ್ಲೂ ನನ್ನೊಂದಿಗೆ ಇರುತ್ತಾಳೆ..ಸಾವಿರ ಜಸ್ಟ್ ಫ್ರೆಂಡ್ಸ್ ಗಿಂತಾ 1 ಬೆಸ್ಟ್ ಫ್ರೆಂಡ್ ಮೇಲು ಎನ್ನುವಂತೆ ಹೃದಯವನ್ನು ತುಂಬಿಕೊಂಡಿದ್ದಾಳೆ...

ಫಾದರ್

ಫಾದರ್-an Iranian movie..I wish all my friends have to watch this cute n nice movie..

ಗುಬ್ಬಚ್ಚಿ ಸುಂದರಿ!!

ನಮ್ಮನೆ ಉಪ್ಪರಿಗೆಯಲ್ಲಿ ನನ್ನ ಹಾಗೂ ಅಕ್ಕನ ಪುಟ್ಟ ಕೋಣೆ.ಈ ಬಾರಿ ಹಬ್ಬಕ್ಕೆ ಹೋದಾಗ ಹೊಸದಾಗಿ ಒಬ್ಬ ಅತಿಥಿ ನಮ್ಮೀ ಕೋಣೆಗೆ ಸೇರ್ಪಡೆಯಾಗಿದ್ರು..ಹೇಳೋದ್ ಕೇಳಿ ಯಾರೋ ಅನ್ಕೊಂಡ್ರಾ?
ಪುಟ್ಟ ಜೀವ ಗುಬ್ಬಚ್ಚಿ ಕಣ್ರೀ...
nammaneyoLage ಯಾವಾಗಲೂ 8-10 ಗುಬ್ಬಿಗಳು ಹಾರಾಡಿಕೊಂಡೇ ಇರುತ್ವೆ.ಅವಕ್ಕೆ ಸುಗ್ರಾಸ ಭೋಜನ ,ಉಪಚಾರ ಎಲ್ಲವೂ ಹೇರಳವಾಗಿ ದೊರೆಯುವುದರಿಂದ ನಿರ್ಭೀತವಾಗಿ ಇರುತ್ತವೆ.ಆದ್ರೆ ಈ ಗುಬ್ಬಚ್ಚಿ ವಿಶೇಷ ಅಂದ್ರೆ ನಮ್ ರೂಮ್ನ ಕನ್ನಡಿ ಎದರು ಕೂತು ಇಡೀ ದಿನ ಕನ್ನಡಿ ನೋಡುವುದು,ಕುಕ್ಕುವುದು...ನಾನೂ ಅದಕ್ಕೆ ತೊ೦ದರೆಯಾಗುತ್ತೆಂದು 1 ದಿನ ಅತ್ತ ಹೋಗಲಿಲ್ಲ.. ಹೊರಗಿನಿಂದಲೇ ನೋಡುತ್ತಿದ್ದೆ.ಆದ್ರೆ ಕನ್ನಡಿ ಬಿಟ್ಟು ಹಂದದ ಗುಬ್ಬಿಯನ್ನು ನೋಡುವಾಗ ಎಲ್ಲಿ ಸಾಯುವುದೋ ಎಂದು ಭಯವಾಯಿತು.ಕಾಲುಗಳನ್ನು ತಗೊಂಡು ಹೋಗಿ ಪಕ್ಕಕ್ಕಿಟ್ಟೆ..ಊಂಹೂ!ಪಕ್ಕದಲ್ಲೇ ನಿಂತರೂ ಹೆದರಿಕೆಯೇ ಇಲ್ಲ..ಅಮ್ಮ ಬಂದು ಏನ್ ಮಾಡುತ್ತೋ ನೋಡಣ ಅಂತ ಕನ್ನಡಿ ತಿರುಗಿಸಿ ಇಟ್ಟಳು.ಹೊರ ಹೋಗುವುದು,ಒಳ ಬರುವುದು,ಕನ್ನಡಿಗಾಗಿ ಹುಡುಕುವುದು...ಗುಬ್ಬಚ್ಚಿ full restless..
ಮರುದಿನ ಬೆಳಿಗ್ಗೆ ಮತ್ತೆ ಕನ್ನಡಿ ಸರಿ ಇಟ್ವಿ,ಎಲ್ಲಿತ್ತೋ ಹತ್ತು ನಿಮಿಷದಲ್ಲಿ ಕನ್ನಡಿಯ ಮೇಲೆ ಗುಬ್ಬಿ ಪ್ರತ್ಯಕ್ಷ..! ಕುತೂಹಲಗೊಂಡ ನಾವು ಮನೆಯವರೆಲ್ಲಾ ನಮ್ಮದೇ ಆದ ಕತೆ ಹೆಣೆದುಕೊಂಡು ಗುಬ್ಬಿಯ ನಡತೆಗೆ ಕಾರಣ ಕೊಟ್ಟುಕೊಂಡು ತೃಪ್ತಿ ಹೊಂದಲು ಪ್ರಯತ್ನಿಸಿದೆವು....ಬಹುಶಃ ಹಿಂದಿನ ಜನ್ಮದಲ್ಲಿ ರಾಜಕುಮಾರಿಯಾಗಿತ್ತೇನೋ ಅಥವಾ ಇನ್ನಾವುದೋ ಗುಬ್ಬಿಮರಿ ಒಳಗಿದೆ ಎಂದು ಬಿಡಿಸುವ ಪ್ರಯತ್ನವೋ ,ಅಥವಾ ಅದಕ್ಕೆ narciscistic personality disorder ಇರಬಹುದೇನೋ ಎಂದು ಮಾತಾಡಿಕೊಂಡೆವು..
ಅಮ್ಮ ಒಂದು ದಿನ ಕನ್ನಡಿಯನ್ನು ಅಲ್ಲೇ ಹಾಸಿಗೆ ಮೇಲಿಟ್ಟು ಗುಬ್ಬಿ ಕೂರುತಿದ್ದ ಜಾಗದಲ್ಲಿ ಕೈ ಇಟ್ಟುಕೊಂಡು ಮಲಗಿದಳು..ಕೈ ಮೇಲೇ ಬಂದು ಕುಳಿತಿತು..ನನಗೋ ಮೈ ಎಲ್ಲ ರೋಮಾಂಚನ!!ಹೂವಿನಂತಾ ಪುಟ್ಟ ಜೀವವೊಂದು ಅಮ್ಮನ ಅಂಗೈ ಮೇಲೇ ಪಿಳಿಪಿಳಿ ಕಣ್ಣು ಬಿಡುತ್ತಾ 'ಚೀವ್ ಚೀವ್ 'ಎನ್ನುತ್ತಿದ್ದರೆ ನಾನಂತೂ ಅಕ್ಷರಶಃ ಕುಣಿಯುತ್ತಿದ್ದೆ..
ಹೀಗೆ ಇಂದಿಗೆ ವಾರವಾಯಿತು..ಮೊನ್ನೆ ಮನೆಯಲ್ಲಿ ಹೋಮ ಇದ್ದಿದ್ರಿಂದ ನೆಂಟರೋ ನೆಂಟರು..ಮಕ್ಕಳೆಲ್ಲಾ 'ಗುಬ್ಬಚ್ಚಿ ಗುಬ್ಬಚ್ಚಿ' ಎಂದು ಕೂಗುತ್ತ ಹತ್ತಿರ ಹೋದಂತೆಲ್ಲ ನನಗೆ ಭಯ ..ಎಲ್ಲಿ ಗಾಬರಿಗೊಂಡ ಗುಬ್ಬಿ ಇನ್ನು ಮುಂದೆ ಬರುವುದಿಲ್ಲವೋ ಎಂದು.ಮಕ್ಕಳಿಗೆಲ್ಲಾ ಬೈದು ಹೊರ ಹಾಕಿ ರೂಮ್ಗೆ ಬೀಗ ಜಡಿದೆ.ನಿನ್ನೆ ಬೆಳಿಗ್ಗೆ ಹಾಸ್ಟೆಲ್ಗೆ ಹೊರಡುವ ಮುಂಚೆಯೊಮ್ಮೆ ಉಪ್ಪರಿಗೆಗೆ ಓಡಿ ಗುಬ್ಬಚ್ಚಿ ಇದೆ ಎಂದು ಖಾತ್ರಿ ಪಡಿಸಿಕೊಂಡು ಸಮಾಧಾನದ ನಿಟ್ಟುಸಿರು ಬಿಟ್ಟೆ..'ಟಾಟಾ' ಹೇಳಿ ಮನೆಯಿಂದ ಹೊರಬಿದ್ದೆ..ಈಗ phoneನಲ್ಲಿ ವಿಚಾರಿಸುವಾಗ 'ನನ್ ರೂಂ' ಹೋಗಿ 'ಗುಬ್ಬಿ ರೂಂ 'ಎಂದು badalaagiddu ನನ್ನ ಗಮನಕ್ಕೆ ಬಂದು ಇನ್ನಷ್ಟು ಸಂತಸವೇ ಆಯ್ತು..

(ಉದಯವಾಣಿಯಲ್ಲಿ ಪ್ರಕಟ)

prapaatha

ಸುಚೇಂದ್ರ ಪ್ರಸಾದ್ ನಿರ್ದೇಶನದ ಪ್ರಪಾತ ಚಿತ್ರವನ್ನು ನೋಡಿದೆ..
ವಿಮಾನದ ನೀಲನಕ್ಷೆಯನ್ನು wright brothers ಕಂಡುಹಿಡಿಯುವ ಮುನ್ನವೇ ಭಾರತದ ಆನೇಕಲ್ ಸುಬ್ಬಾ ಶಾಸ್ತ್ರಿಗಳು ಸಿದ್ದಪಡಿಸಿದ್ದರೆ೦ಬುದನ್ನು ಜನರಿಗೆ ಮುಟ್ಟಿಸಲು ಮಾಡಿದ ಒಂದು ಪ್ರಯತ್ನ...ಅಪಾರವಾದ ಅಧ್ಯಯನದ ನಂತರವೇ ಚಿತ್ರ ಹೊರಬಂದಿದೆ ಎಂಬುದು ನೋಡುವಾಗಲೇ ತಿಳಿಯುತ್ತದೆ..ಚಿತ್ರದ ನಾಯಕನ ಹುಲ್ಲಿನಲ್ಲಿ ಸೂಜಿ ಹುಡುಕುವ ಕಾರ್ಯವನ್ನು ಸೂಚ್ಯವಾಗಿ ತೋರಿಸಲಾಗಿದೆ..ಎಲ್ಲಾದರೂ cd ಸಿಕ್ಕಿದರೆ ನೋಡಲು ಮರೆಯದಿರಿ...